أهلاً وسهلاً بكل زوار مدونة أقلام حائرة....إذا كانت لديكم أية ملاحظات أو اقتراحات راسلونا على عنوان المدونة confusedideas@yahoo.com ..... نتمنى لكم زيارة مفيدة ومتكررة بإذن الله....

2007/11/15

لله يا محسنين !

بسم الله الرحمن الرحيم

كنت أتابع الطريق العام من نافذه سياره أبى ونحن فى طريق عودتنا من مدينه المنصوره الى منزلنا .. حين لاحظت سياره الاسعاف التى تجاهد لكى تشق طريقها وسط نهر السيارات لكى تصل بمصاب الى المستشفى او تصل لمصاب فى مكان حادث أو شيئ ما ..
لفت نظرى كلمه مكتوبه على جانب السياره وهى ( هديه من الشعب اليابانى )!!
فى هذه اللحظه تذكرت ما قالته لى اختى يوم ما حين قالت لى ( احنا جالنا كتب النهارده للمكتبه مكتوب على الكراتين من بره .. هديه من الشعب الامريكى )!!
حسنا.. هناك أعتراف بسيط..
لاول مره الاحظ أننا شعب شحات!
لنحص معا ما تعرفه .. وستجد أنى على حق !
فلابد أنك قرأت هذه الجمله عشرات المرات ( اهداء من شعب كذا ! )
ومن أوضح صور الهدايا .. المعونه الامريكيه .. تلك المعونه التى تجثم بها الولايات المتحده على قلب شعبنا .. فيصبح لها – بالطبع- الحق فى التدخل فى كل حاجه وأى حاجه فى اى وقت حسب ما مزاج الرئيس بتاعهم يقول كده ..
وأنا اقصد طبعا المعونه التى كانت تتحدث عنها الصحف القوميه كلها تحت بند لا يتعدى هذا العنوان الذى قرأته فى جريده الجمهوريه فى صفحتها الاولى ( نحن نستحق المعونه الامريكيه .. دورنا فعال فى المنطقه كما أننا نسعى للديموقراطيه والاصلاح فى كافه المجالات .. الخ الخ الخ ) فى الحقيقه لقد كدت أسقط أرضا من فرط الضحك حين قرأت هذه العنوان ( لم يكن هذا نصه لانى لا أذكره الحقيقه )
فصحافتنا القوميه جميعها كانت تقول فى نفس واحد : احنا غلابه ونستحق الحسنه ! حسنه قليله تمنع بلاوى كتيره !
ولكنها – والشهاده لله- لا تقول ذلك بطريقه مباشره بل تدور حولها .. وتقولها بطريقه ملتويه نوعا
فهى تقول مثلا :
نحن دوله قويه ولنا دور سياسى فعال فى الشرق الاوسط – هذا الدور الذى تنازلنا عنه طواعيه وبأريحيه بالغه – لذلك عليكم برشوتنا لكى نكون بجانبكم فى حربكم القادمه .. سواء ضد سوريا أو ضح ليببا..
أو تقول مثلا :
نحن ننفذ ما تقولوا.. وننتظر المكافأه !
*...........*
الغريب..
أننى بسبب ما ربطت حدث فى الماضى بأيامنا الحلوه دى.
كلنا نعرف قصه السد العالى .. حين لجأ الرئيس جمال عبد الناصر للسلف – مش الشحاته – من البنك الدولى .. ولكن للأسف البنك عمل معاه الدنئيه وموافقش .... قال نبص على املاك البلد بأه!
عمل ايه الراجل ؟
راح مرجع لنا قناه السويس وبنا السد والاشيه بقت معدن والحمد لله !
أما فى عصرنا المزهزه ..
نحن نبيع فى الملكيه العامه لكى نصلح فى أوضاع البلد ( ان كان شيئ كهذا ممكن ..)
السؤال بيقول علل !
طب ولما الشركات والمصالح الحكوميه كلها تتخصخص .. هنبيع ايه تانى؟ !

الاجابه طبعا .. نجيب ( جمال) عبد الناصر تانى علشان يأمم كل اللى اتباع واتخصخص !
والله حرام بجد ! .. انا اعرف اننا دوله قويه .. وأعرف اننا دوله غنيه .. ولكن لكى اكون صادق وموضوعى .. ضع كلمه سابقا بعد كل جمله من الجمل السابقه ..
حقا ..
لا اعرف لم الاعتماد على الغريب..
لم نضع ايدينا فى جيب الغريب لكى يصرف علينا .؟
المسأله مش مسأله كرامه ! – لتكونو حاسيين انها بتنقح عليا ولا حاجه .. رغم اننها بتنقح والله – ولكنها مسأله سياسه بحته
فالمعونه الامريكيه .. مصدر ضغط دائم على الحكومه المصريه ..
يقولوا لنا يمين .. يبأه يمين علشان المعونه !
يقولوا لنا شمال .. يبأه شمال علشان المعونه ..
وانسى ..

أم يحن الأوان بعد لقتل أفعى المعونه اللتى تلتف حول رقبه مصالح البلاد؟ ولا هو أبو بلاش كتر منه وخلاص؟
لا أعرف ..
ان كان شخص بسيط مثلى لاحظ ذلك.. فأين دكاتره الاقتصاد؟ أين دكاتره السياسه الموجودين فى الحكومه؟
أين لجان البحث والذى منه ؟ .. !!
الا يمكن مثلا الاستغناء عن تلك المعونه وغيرها تدريجيا .. بحيث خلال (س) من السنوات يمكننا الاستغناء عنها نهائيا .. ويكون لنا القدره على صنع قراراتنا بدون ضغط أو توجيه ؟
ومين عارف..
يمكن نلاقى فى امريكا قريب عربيات اسعاف مكتوب عليها ( اهداء من شعب مصر الكريم أوى خالص) بس هتكون مكتوبه بالانجليزى طبعا !!



9 comments:

Anonymous said...

بجد مدونة رائعة وتحياتي لكم جميعا .. وقد اكتشفت الآن أن وراء المدونة كتيبة ممتازة تستحق التقدير والإعجاب وأنها تستحق أن تكون مجلة نتية مستقلة أيضا ..

لذلك ولأنني عرفت نفسي في تعليقي على موضوع إبراهيم باشا عيسى منذ قليل .. فأحب أن أقول شيئين الآن ..

أولا أدعوكم لمشاركتي وزملائي قريبا في الكتابة في مجلة نتية شبابية أسمها نحلم كانت موجودة من قبل ثم توقفت لأسباب خارجة عن إرادتنا وكنت أنا ومجموعة من الزملاء قد أنشأناها معا لكننا نعاود الآن الاستعداد لإصدارها من جديد
وأتمنى أن تنضموا لنا .. لآنتا بنحلم بأحلام كثيرة وأهما أن يكون لدينا أقلام مميزة مثلكم ..

ثانيا هذا الموضوع تحديدا جميل جدا جدا وإن لم أعرف من كاتبه .. ( وياريت كل واحد يبقى يمضى على موضوعه .. علشان نعرف ننقده ..!!)
وأستسمح كاتبه أنى هاكتب عنه قريبا مع الإشارة له بالتأكيد في موقع بص وطل ...
بس تعرفني أسمك والنبي ..
ولكم تحياتي جميعا ..
ماجد إبراهيم

Anonymous said...

يا أستاذنا
الحكاية مش حكاية فقر ولا حاجة
ولا حكاية شحاتة
الحكاية وما فيها
إن الحكومة عينها فارغة شويتين
أو تلات شويات

يعني المفروض يبقوا مكسوفين لما تبقى مستشفى السرطان
بيشحتوا عليها من خمس سنين
ولسه لحد دلوقتي بيشتروا في الأجهزة
طيب فين الحكومة
ووزارة الصحة
طيب فين وزارة اللي عندهم دم

هما اتعودوا على كده
وأصبح الشعب لايجد حرج في انه يشوف الحكومة بتشحت عليه
وهو مبسوط كده
ومرتاح كده

إنما بقا بالنسبة لحكاية نجيب (جمال ) عبد الناصر وللا لأ

أحب اطمنك
انه غير اسمه
وجاي

NESHO said...

السلام عليكم ورحمة الله
أولا طبعا مرحبا بكم فى اولى مقالاتىف ى المدونه التحفه دى...

نرد بأه على الشباب اللى زى الفل دول ..

بالنسبه ل( صحفى مشاغب ) منور يا مان والله .. :D

بالنسبه للمجله اللى حضرتك أشرت لها .. سيتم التشاور طبعا مع أفراد الكتيبه وهنرد عليك..
وان كنت أتمنى انك تحط رابط المدونه علشان نتصفحها وكده...:D

بالنسبه لاطرائك على الموضوع فأنا شاكر لك يا اخى على ذوقك .. واتمنى انى اكون فعلا كتبت حاجه تعجب يا عم ماجد.. :D

بالنسبه لاسمى .. فأنا اسمى محمد وصحابى بيقولوا ليا ( نيشو nesho)
شكرا على مرورك ..

الاخ الكريم ( ابراهيم محمد ) - أحييك على كتابه اسم محمد بالطريقه دى على فكره !-
كلامك عاجبنى جدا والله وليك فى كل سطر نقطه تتحسبلك .. خصوصا موضوع المستشفى .. بجد حاجه تفقع !



بس كلمه فى ودنك.. شكلك فاهمنى يا بيه !!!.. :-P :-P:-P:-P



يلا
سلام ولى عوده ان شاء الله

Anonymous said...

يا نهار ! ... انت منتشر هنا من امتى يا نيشو ؟!
و الله المدونة بوجودك بقى لها طعم تانى و يا رب بس الحماسة ما تاخدكش علشان الغلابة دول ما يتسحلوش معاك ....

ذكرك لموقف جمال عبد الناصر حسسنى بمرارة فعلا ...يعنى التغيير موجود و ممكن جدا بس محتاج بس شوية ( كرامة ) اللى تقريبا بقى تربية الشعب على التكيف على عدم وجودها هى السياسة الحالية

NESHO said...

احم..
ازيك يا دكتوره ؟

والله انا مش عايز حاجه
لا اتسحل ولا حد يتسحل معايا !
عموما..
بالنسبه لمسأله الكرامه !

فهناك بيت واحد بس يتقال فى الموقف ده ...


اذا لم تكون لى والزمان شرم برم.. فكيف حالك والزمان ترللى !!!

hopy said...

مقال جميل يانيشو ومهم جدا وماتقوله فى مقالك غلب يقوله ناس كثير ودكاترة اقتصاد لكن انسى بننفخ فى اربة مقطوعه مصر قوية وغنية وليس سابقا لكن دلوقتى كمان لكن فلوسها انتوا عارفين رايحه فين هو لو حد بيفكر اصلا فى الحكومة فى مصلحة مصر او بيفكر اساسا فى اى حاجة كان بقى ده حال مصر الغالية وحال اهلها وحتى حال شوارعها
شكرا نيشو على الموضوغ

hopy said...

مقال جميل يانيشو ومهم جدا وماتقوله فى مقالك غلب يقوله ناس كثير ودكاترة اقتصاد لكن انسى بننفخ فى اربة مقطوعه مصر قوية وغنية وليس سابقا لكن دلوقتى كمان لكن فلوسها انتوا عارفين رايحه فين هو لو حد بيفكر اصلا فى الحكومة فى مصلحة مصر او بيفكر اساسا فى اى حاجة كان بقى ده حال مصر الغالية وحال اهلها وحتى حال شوارعها
شكرا نيشو على الموضوغ

Anonymous said...

نحن قومٌ أرضنا امٌ نلبي ما تشاءْ
ولها نقف احتراماً نحن نحترم النساءْ
مش عارف ليه افتكرت الكلام ده لما قريت موضوعك يا نيشو !!!
ما علينا !
انا شايف انك متحامل شوية علي الحكومة وبتقول عليهم شحاتين ..حرام عليك يا ابني .. ان بعض الظن اثم

اولاً عربيات الاسعاف المصري بتشتغل بالجاز وملوثة للبيئة جدا .. والعربيات الياباني بتمشي بالنزين . يعني الحكومة مش هتوفر أهوه ..

ثانياً العربيات المصري بطيئة جداً .. يعني العيان هيكون مات وشبع موت علي بال لما يروح المستشفى

ثالثاً العربيات المصري حجمها كبير ( علّة يعني ) ومش ينفع تمشي في الزحمة .. العربيات الياباني مصممة ككل ما هو ياباني - صغيرة وحِركة- وتفوت في وسط الزحمة وهي ايضا متفصلة علي حجم المريض الياباني والحواري اليابانية..

رابعاً بقي وده الاهم الناس دول مش عارفين يودوا انتاجهم فين .. فاض علي الشعوب المجاورة وغير المجاورة .. عايزين يخفوا الحمل شوية .. كفاية بقي .. ما يقدروش يقعدوا من غير الشغل .. والمليان يصب علي الفاضي .. عادي يعني .. خليك لارج وما تخدش الموضوع بحساسية كده .. خليك كووووووووول يا مان ..

أنا شايف ان الموضوع مش شحاته ولا حاجة وبعدين يا سيدي ( النبي قبل الهدية ) وكله في خدمة المواطنين والمرضى وربنا يخلي البيه الوزير والسادة أعضاء مجلسي الشعب والشورى وجميع الوزراء والرؤساء والزعماء

وفي النهاية أحب أقولك سلام وكل عام وانتم بخير

بسسسسسسسسسسس !

معكش جنيه سلف !!!

Anonymous said...

بالمناسبة ..

جمال كده كده جاي متقلقش .. وهيجيب نقالات مش عربيات اسعاف بس